नेप्सेमा १९.६७ अंकको गिरावट, सबै उपसमूह राताम्य हुँदा कारोबार ४.६१ अर्बमा सीमित

काठमाडौं– साताको अन्तिम कारोबार दिन नेपाल स्टक एक्सचेञ्ज (नेप्से) परिसूचक दोहोरो अंकले घटेको छ। बजारमा बिक्री दबाब बढेपछि नेप्से १९.६७ अंकले घट्दै २ हजार ६०१.९२ विन्दुमा झरेको हो।

आज ठूला कम्पनीको कारोबार मापन गर्ने सेन्सेटिभ परिसूचक २.४९ अंकले घटेर ४५४.१९ विन्दुमा सीमित रह्यो। त्यस्तै, फ्लोट परिसूचक १.२१ अंकले ओरालो लागेर १७८.६८ विन्दुमा पुगेको छ भने सेन्सेटिभ फ्लोट परिसूचक ०.९२ अंकले घट्दै १५३.६७ विन्दुमा कायम भएको छ।

कारोबार रकम भने ४ अर्ब ६१ करोड १९ लाख रुपैयाँभन्दा बढी पुगेको छ। दिनभर ८७ लाख ५१ हजार ३८० कित्ता शेयर किनबेच भएका छन्।

बजारमा व्यापक बिक्री दबाब देखिँदा कारोबार भएका सबै १३ उपसमूह राताम्य बने। समग्र बजारमा ४२ कम्पनीको शेयर मूल्य बढ्दा २२९ कम्पनीको मूल्य घटेको छ, जसले लगानीकर्ताको मनोबल कमजोर रहेको संकेत गरेको छ।

आजको कारोबारमा उपकार लघुवित्त वित्तीय संस्था, स्नो रिभर लिमिटेड र कुमारी सबल योजनाका लगानीकर्ताले सर्वाधिक लाभ कमाए। विपरीत, विओके डिबेञ्चर, सल्पा विकास बैंक र थ्रिस्टार हाइड्रोपावर कम्पनीका लगानीकर्ताले सबैभन्दा बढी नोक्सानी बेहोरे।