इरान–अमेरिका तनाव चुलियो, हेलिकोप्टर घटनापछि अमेरिकी सैन्य कारबाही सुरु

काठमाडौं । अमेरिकी राष्ट्रपति डोनाल्ड ट्रम्पले स्ट्रेट अफ होर्मुज क्षेत्रमा अमेरिकी हेलिकोप्टरमाथि भएको आक्रमणपछि इरानविरुद्ध सैन्य कारबाही सुरु गरिएको घोषणा गरेका छन्। अमेरिकी सेनाले उक्त घटनालाई आफ्ना सैनिक र सैन्य सम्पत्तिमाथिको आक्रमण भन्दै जवाफी अभियान सञ्चालन गरेको जनाएको छ।

अमेरिकी सेनाको सेन्ट्रल कमान्ड (सेन्टकम) का अनुसार मंगलबारदेखि सुरु गरिएको अभियान हेलिकोप्टर घटनाप्रतिको प्रतिकारात्मक कदम हो। सेन्टकमले जारी गरेको विज्ञप्तिमा इरानको आक्रामक गतिविधिको जवाफस्वरूप सीमित सैन्य कारबाही अघि बढाइएको उल्लेख गरिएको छ।

अन्तर्राष्ट्रिय सञ्चारमाध्यमहरूका अनुसार पर्सियन गल्फ तथा स्ट्रेट अफ होर्मुज आसपासका विभिन्न क्षेत्रमा विस्फोटका आवाज सुनिएका छन्। अमेरिकी सेनाले दुर्घटनाग्रस्त अपाचे हेलिकोप्टरका दुई चालक दलका सदस्यलाई सुरक्षित उद्धार गरिएको जानकारी दिएको छ।

राष्ट्रपति ट्रम्पले सामाजिक सञ्जाल ट्रुथ सोसलमार्फत दुवै पाइलट सुरक्षित रहेको पुष्टि गर्दै आवश्यक परे थप कदम चाल्न अमेरिका तयार रहेको बताएका छन्।

अमेरिकी अधिकारीहरूका अनुसार हेलिकोप्टरमाथि ड्रोनमार्फत आक्रमण गरिएको आशंका गरिएको छ। यद्यपि उक्त आक्रमण जानाजानी गरिएको थियो वा होइन भन्ने विषयमा अनुसन्धान जारी रहेको जनाइएको छ।

अमेरिकी सञ्चारमाध्यम एक्सिओसका अनुसार अमेरिकी कारबाही मुख्य रूपमा इरानका रक्षा तथा राडार प्रणालीलाई लक्षित गरिएको छ। इरानी सरकारी सञ्चारमाध्यमहरूले बन्दर अब्बास, केसम र सिरिकलगायत क्षेत्रमा विस्फोटका आवाज सुनिएको बताएका छन्।

यस घटनापछि इरानका परराष्ट्रमन्त्री अब्बास अराघचीले अमेरिकालाई चेतावनी दिँदै आफ्नो देशले कुनै पनि आक्रमण वा धम्कीको उचित जवाफ दिने बताएका छन्। उनले सामाजिक सञ्जाल एक्समार्फत अमेरिकाले तनाव बढाउने बाटो रोजेको आरोप लगाएका छन्।

हेलिकोप्टर घटनापछि सुरु भएको यो सैन्य टकरावले मध्यपूर्व क्षेत्रमा थप अस्थिरता निम्त्याउने चिन्ता बढाएको छ।