इजरायल र हिजबुल्लाहबीच युद्धविराम, मध्यपूर्व शान्ति प्रयासले लियो नयाँ मोड

काठमाडौं / इसराइल र लेबननस्थित इरान समर्थित हिजबुल्लाहबीच युद्धविराम लागू भएसँगै मध्यपूर्वमा तनाव कम हुने संकेत देखिएको छ। अन्तर्राष्ट्रिय समाचार संस्था रोयटर्सका अनुसार शुक्रबार स्थानीय समयअनुसार अपराह्न ४ बजेदेखि युद्धविराम प्रभावमा आएको हो।

अमेरिका, कतार र इरानको मध्यस्थतामा भएको समझदारीपछि दुवै पक्षले आगामी जुन २३–२५ मा वाशिङ्टनमा हुने इजरायल–लेबनान वार्ताको अर्को चरणबारे समेत छलफल गरेका छन्। अमेरिकी राष्ट्रपति डोनाल्ड ट्रम्पले पनि युद्धविरामका लागि इसराइललाई सहमत हुन आग्रह गरेको बताएका छन्।

युद्धविरामसँगै अमेरिका–इरान वार्ता पुनः अघि बढ्ने तयारी भएको छ। अमेरिकी विशेष दूत स्टिभ विटकोफ स्विट्जरल्याण्ड पुग्ने तयारीमा रहेको बताइएको छ। यसअघि लेबननमा जारी आक्रमणका कारण तय भएको वार्ता स्थगित भएको थियो।

युद्धविरामको प्रभाव ऊर्जा बजारमा समेत देखिएको छ। अन्तर्राष्ट्रिय तेल बजार स्थिर बन्दै गएको छ भने ब्रेन्ट कच्चा तेलको मूल्य साप्ताहिक रूपमा करिब ८ प्रतिशत घट्ने दिशामा रहेको छ। साथै स्ट्रेट अफ हर्मुजमार्फत तेल ढुवानी पुनः बढ्न थालेको छ।

विश्लेषकहरूका अनुसार युद्धविराम सफल भए मध्यपूर्वमा दीर्घकालीन शान्ति स्थापना तथा विश्व ऊर्जा आपूर्तिमा देखिएको दबाब कम हुने अपेक्षा गरिएको छ।