मानबहादुर कार्की प्रमुख निर्वाचन आयुक्तमा सिफारिस, दुई आयुक्तको नाम पनि टुंगियो

काठमाडौं – संवैधानिक परिषद्ले मोरङका मानबहादुर कार्कीलाई प्रमुख निर्वाचन आयुक्तमा सिफारिस गरेको छ।

शुक्रबार प्रधानमन्त्री बालेन्द्र शाह (बालेन)को अध्यक्षतामा बसेको परिषद्को बैठकले कार्कीको नाम प्रमुख निर्वाचन आयुक्तका लागि अनुमोदन गरेको हो। साथै, पूर्व डीआईजी डा. राजीव सुब्बा र अवकाशप्राप्त सरकारी वकिल गुरु वाग्लेलाई निर्वाचन आयुक्तमा सिफारिस गर्ने निर्णय पनि गरिएको छ।

प्रमुख निर्वाचन आयुक्तको पद लामो समयदेखि रिक्त रहेकाले निर्वाचन आयोग कार्यवाहक नेतृत्वमा सञ्चालन हुँदै आएको थियो। अब संसदीय सुनुवाइसहित आवश्यक संवैधानिक प्रक्रिया पूरा भएपछि कार्की प्रमुख निर्वाचन आयुक्त तथा सुब्बा र वाग्ले निर्वाचन आयुक्तका रूपमा नियुक्त हुनेछन्।

निर्वाचन आयोगले संघ, प्रदेश र स्थानीय तहका निर्वाचन सञ्चालन, मतदाता नामावली व्यवस्थापन, राजनीतिक दलको नियमनलगायत संवैधानिक जिम्मेवारी निर्वाह गर्दै आएको छ।