नेप्सेमा दोहोरो अंकको गिरावट, पाँच अर्बमाथिको कारोबार

काठमाडौं । साताको कारोबारको क्रममा नेपाल स्टक एक्सचेञ्ज (नेप्से) परिसूचक दोहोरो अंकले घट्दै बजारमा पुनः बिक्री दबाब देखिएको छ। अधिकांश उपसमूहमा गिरावट आउँदा नेप्से १३.९५ अंकले घटेर २,७१२.५४ बिन्दुमा सीमित भएको हो।

नेप्सेका अनुसार ठूला कम्पनीहरूको कारोबार मापन गर्ने सेन्सेटिभ परिसूचक २.१० अंक घटेर ४७०.३१ बिन्दुमा झरेको छ। यस्तै, फ्लोट सूचक ०.७७ अंकले घटेर १८५.८५ र सेन्सेटिभ फ्लोट सूचक ०.५८ अंकले ओरालो लाग्दै १५९.४३ बिन्दुमा पुगेको छ।

बजार घटे पनि कारोबार रकम भने पाँच अर्ब नाघेको छ। दिनभर एक करोड १३ लाख ६२ हजार ४६५ कित्ता सेयर पाँच अर्ब १८ करोड ७४ लाख ६७ हजार ७३ रुपैयाँमा खरिद–बिक्री भएको नेप्सेले जनाएको छ।

आज कारोबार भएका १३ उपसमूहमध्ये दुई उपसमूहमा मात्रै हरियाली देखिएको छ भने बाँकी ११ उपसमूह राताम्मे बनेका छन्। बजारमा ७७ कम्पनीको सेयर मूल्य बढ्दा १९३ कम्पनीको मूल्य घटेको छ। सात कम्पनीको सेयर मूल्य भने स्थिर रहेको छ।

कारोबारका आधारमा एभरेष्ट कलर्स लिमिटेड, भुगोल हाइड्रोपावर र साल्पा विकास बैंकका लगानीकर्ताले सबैभन्दा बढी कमाएका छन्। विपरीत, एनसीसी डिबेञ्चर, नेपाल इन्भेष्टमेन्ट बैंक डिबेञ्चर र एनबिबिएल डिबेञ्चरका लगानीकर्ताले सर्वाधिक गुमाएका छन्।