१५० वर्षपछि अमेरिकी उपराष्ट्रपतिको कार्यकालमै सन्तान जन्मिएको ऐतिहासिक घटना

काठमाडौं / अमेरिकी उपराष्ट्रपति जेडी भान्स र उनकी पत्नी उषा भान्स चौथो सन्तानका अभिभावक बनेका छन् । दम्पतीले आइतबार बिहान पुत्र एलेक नील भान्सको स्वागत गरेको जानकारी उपराष्ट्रपति भान्सले सामाजिक सञ्जालमार्फत सार्वजनिक गरेका हुन् ।

बीबीसीका अनुसार, पदमा बहाल रहेका अमेरिकी उपराष्ट्रपतिको कार्यकालकै दौरान सन्तान जन्मिएको यो घटना करिब डेढ शताब्दीयताकै पहिलो हो । एसोसिएटेड प्रेसले पनि १५० वर्षभन्दा बढी समयपछि यस्तो दुर्लभ संयोग दोहोरिएको उल्लेख गरेको छ ।

जेडी र उषा भान्सका यसअघि तीन सन्तान छन् । उनीहरूका नौ वर्षीय इभान, ६ वर्षीय विवेक र चार वर्षीया मिराबेल छन्। नयाँ सदस्यको आगमनसँगै भान्स परिवार चार सन्तानको अभिभावक बनेको छ ।

उषा भान्स क्यालिफोर्नियाको सन डिएगोमा जन्मिएकी हुन्। भारतको आन्ध्र प्रदेशबाट अमेरिका बसाइँ सरेका आप्रवासी परिवारमा हुर्किएकी उषाका बुवा मेकानिकल इन्जिनियर तथा आमा आणविक जीवविज्ञानविज्ञ हुन् ।

जेडी र उषाको परिचय सन् २०१० मा येल ल स्कुलमा अध्ययनका क्रममा भएको थियो। ‘श्वेत अमेरिकामा सामाजिक पतन’ विषयक छलफल कार्यक्रममा सहभागी हुने क्रममा उनीहरूबीच चिनजान भएको थियो, जुन पछि वैवाहिक सम्बन्धमा परिणत भएको थियो ।

नवजात पुत्रको जन्मसँगै भान्स परिवारमा खुसी छाएको छ भने अमेरिकी राजनीतिक वृत्तमा पनि यो घटनाले ऐतिहासिक महत्व पाएको छ ।