विराटनगरमा महिलामैत्री स्वास्थ्य अभियान : पाठेघर तथा स्तन क्यान्सर परीक्षणमा बढ्दो सहभागिता

विराटनगर / महिलाको प्रजनन स्वास्थ्य संरक्षण र समयमै रोग पहिचान गर्ने उद्देश्यले विराटनगरमा सञ्चालन गरिएको विशेष स्वास्थ्य परीक्षण शिविरमा उल्लेख्य सहभागिता देखिएको छ । पाठेघरको मुखको क्यान्सर, स्तन क्यान्सर, आङ खस्ने समस्या तथा फिस्टुला सम्बन्धी परीक्षण सेवा प्रदान गरिएको शिविरमा एक सयभन्दा बढी महिलाले स्वास्थ्य जाँच गराएका छन् ।

लायन्स क्लब अफ विराटनगर शुभम र लायन्स क्लब अफ विराटनगर हेल्थ प्रोफेस्नलको संयुक्त आयोजनामा सम्पन्न शिविर विराटनगर महानगरपालिका र वडा नम्बर १० कार्यालयको समन्वयमा सञ्चालन गरिएको हो । शिविरलाई करुणा फाउण्डेसन नेपालको सहयोग प्राप्त भएको आयोजकले जनाएको छ ।

विराटनगर–१० स्थित आधारभूत स्वास्थ्य सेवा केन्द्रमा आयोजित शिविरमा ३० देखि ६० वर्ष उमेर समूहका महिलालाई लक्षित गरी अत्याधुनिक एचपीभी डीएनए विधिबाट पाठेघरको मुखको क्यान्सरको परीक्षण गरिएको थियो । स्वास्थ्यकर्मीका अनुसार यो विधिले प्रारम्भिक चरणमै जोखिम पहिचान गर्न सहयोग गर्ने भएकाले रोगको समयमै उपचार तथा नियन्त्रणमा महत्वपूर्ण भूमिका खेल्छ ।

शिविरमा सहभागी महिलाहरूलाई स्तन क्यान्सरका प्रारम्भिक लक्षण, नियमित स्वास्थ्य परीक्षणको आवश्यकता, प्रजनन स्वास्थ्यसम्बन्धी सचेतना तथा व्यक्तिगत सरसफाइका विषयमा परामर्शसमेत प्रदान गरिएको थियो । स्वास्थ्य विशेषज्ञहरूले पाठेघरको मुखको क्यान्सर नेपालमा महिलामाझ देखिने प्रमुख क्यान्सरमध्ये एक भएकाले नियमित परीक्षणलाई जीवनशैलीको हिस्सा बनाउनुपर्नेमा जोड दिएका छन् ।

आयोजक संस्थाका अनुसार ग्रामीण तथा न्यून आय भएका समुदायका महिलासम्म गुणस्तरीय स्वास्थ्य सेवा पु¥याउने उद्देश्यले यस्ता कार्यक्रम सञ्चालन गरिएको हो । आर्थिक अभाव, चेतनाको कमी तथा स्वास्थ्य सेवामा सीमित पहुँचका कारण धेरै महिलाले समयमै परीक्षण गराउन नसक्ने अवस्था अझै विद्यमान रहेको भन्दै यस्ता शिविरले स्वास्थ्य पहुँच विस्तारमा टेवा पु¥याएको बताइएको छ ।

शिविरमा आङ खस्ने समस्या र फिस्टुलासम्बन्धी परीक्षणसँगै आवश्यक परे थप उपचारका लागि सम्बन्धित स्वास्थ्य संस्थामा रिफर गर्ने व्यवस्था पनि मिलाइएको थियो । धेरै महिलाले पहिलोपटक यस्ता विशेषीकृत स्वास्थ्य सेवा निःशुल्क रूपमा प्राप्त गरेको प्रतिक्रिया दिएका थिए ।

महिला स्वास्थ्यलाई प्राथमिकतामा राख्दै सञ्चालन गरिएका यस्ता अभियानले समुदायस्तरमा स्वास्थ्य सचेतना अभिवृद्धि गर्नुका साथै क्यान्सरजस्ता जटिल रोगको जोखिम न्यूनीकरणमा समेत महत्वपूर्ण योगदान पु¥याउने विश्वास आयोजकहरूको छ । आगामी दिनमा विराटनगरका अन्य वडासहित आसपासका क्षेत्रमा पनि यस्ता स्वास्थ्य परीक्षण तथा सचेतनामूलक कार्यक्रम विस्तार गर्ने तयारी भइरहेको जनाइएको छ ।